Bydd DLL (Hamdden Sir Ddinbych Cyf) yn goleuo eu hatyniadau yn las ar 11eg Ebrill i nodi Diwrnod Parkinson y Byd.
Bydd Tŵr Awyr y Rhyl, Theatr Pafiliwn y Rhyl, Bwyty a Bar 1891, Rhaeadr yr Arena Digwyddiadau, Canolfan Grefftau Rhuthun, a llochesi arfordirol Sir Ddinbych i gyd yn goleuo’n las i gefnogi diwrnod ymwybyddiaeth byd-eang ar gyfer y cyflwr.
Ar hyn o bryd mae tua 166,000 o bobl yn byw gyda Parkinson’s yn y DU, gyda rhywun yn cael diagnosis bob 20 munud. Mae Parkinson’s yn gyflwr niwrolegol cynyddol gyda llawer o symptomau gwahanol, sy’n golygu nad yw profiad neb o Parkinson yr un peth. Gan na ellir gwrthdroi’r clefyd, mae llawer o bobl yn byw gyda Parkinson’s ac yn rheoli eu symptomau trwy ystod o driniaethau.
Dywedodd Jamie Groves, Rheolwr Gyfarwyddwr DLL “Gyda chymaint o bobl yn y DU yn byw gyda Parkinson’s a chyda’r niferoedd yn cynyddu, mae DLL yn credu fod hi’n bwysig codi ymwybyddiaeth o’r cyflwr difrifol hwn. Mae’r union resymau pam mae pobl yn cael Parkinson’s yn dal yn anhysbys ac mae diagnosis yn broses anodd. Felly rydym yn falch o ymuno â chymunedau ledled y wlad i oleuo ein hadeiladau i gefnogi Diwrnod Ymwybyddiaeth Parkinson’s.”