HSDd yn cyhoeddi partneriaeth gyfryngau swyddogol gyda ‘Heart North and Mid Wales’

Mae Hamdden Sir Ddinbych Cyf yn falch o lansio partneriaeth gyda Heart North and Mid Wales, er mwyn hyrwyddo lleoliadau, atyniadau a safleoedd hamdden HSDd ar draws y rhanbarth i wrandawyr Heart.

Daeth HSDd a Heart North and Mid Wales yn bartneriaid yn 2025 ar gyfer ail agoriad atyniad enwog Hamdden Sir Ddinbych, sef SC2 y Rhyl, ac mae’r tîm bellach yn ôl gyda’i gilydd.

Meddai Kristy John, Cyfarwyddwr Gorsaf Heart North and Mid Wales: “Rydym yn falch o fod yn gweithio gyda Hamdden Sir Ddinbych Cyf eto am flwyddyn arall, mae HSDd wrth galon maes hamdden a thwristiaeth Gogledd Cymru felly rydym yn falch o gyhoeddi’r bartneriaeth 12 mis yma.  Mae’n enghraifft wych o sut gall radio ddod â brandiau lleol enwog yn nes at ein gwrandawyr ffyddlon, ar yr awyr ac allan yn y gymuned mewn lleoliadau fel HSDd.

Meddai Jamie Groves, Rheolwr Gyfarwyddwr HSDd “Mae gweithio gyda brand cenedlaethol fel Heart North and Mid Wales yn wych i ni fel cwmni ac rydym yn gyffrous ein bod mewn partneriaeth gyda nhw eto am ail flwyddyn.  Mae gan Heart North and Mid Wales gynulleidfa enfawr ac rydym ni’n credu y bydd y bartneriaeth hon nid yn unig o fudd i HSDd, ond i Sir Ddinbych gyfan. Mae ethos Heart North and Mid Wales yn cynnwys yr un gwerthoedd â HSDd ac rydym ni wir yn gyffrous ein bod am gydweithio dros y 12 mis nesaf.”

Byddwch yn barod i deimlo’r curiad wrth i Noson Northern Soul ddychwelyd i 1891 Y Rhyl

Bydd selogion Northern Soul yn dawnsio drwy’r nos gyda DLL nos Sadwrn 12fed Medi, pan fydd eu noson Northern Soul boblogaidd yn dychwelyd i Fwyty a Bar 1891.
 
Gall cefnogwyr edrych ymlaen at noson o gerddoriaeth a dawnsio na ellir ei cholli, pan fydd 1891, a leolir yn Theatr Pafiliwn Y Rhyl, unwaith eto’n cael ei drawsnewid yn ddathliad bywiog o ddiwylliant enaid. Gall gwesteion edrych ymlaen at noson bythgofiadwy o synau eiconig, dawnsio egnïol, ac awyrgylch croesawgar i gariadon cerddoriaeth, gan ddal gwir ysbryd Northern Soul.
 
Bydd y DJs Tim Conway, Chris Conway, Mike “Moonshine” Roberts a Geoff Allman yn chwarae’r clasuron gan artistiaid chwedlonol, ochr yn ochr â’r caneuon arbennig hynny sydd wedi cadw mudiad Northern Soul yn fyw ers degawdau.
 
Mae tocynnau ar werth nawr a disgwylir i’r galw fod yn uchel. Cynghorir archebu’n gynnar yn gryf.
 
Dywedodd Jamie Groves, Rheolwr Gyfarwyddwr DLL: “P’un a ydych chi’n gefnogwr brwd o Northern Soul neu’n rhywun sydd wedi darganfod llawenydd y genre hynod boblogaidd hwn yn ddiweddar, hoffem eich gwahodd chi i 1891, lle byddwch chi’n cael eich syfrdanu gan yr awyrgylch yn ein nosweithiau Northern Soul hynod boblogaidd. Mae Northern Soul yn genre heb ei ail, gyda ffordd unigryw o ddod â phobl ynghyd, felly dewch â’ch ffrindiau a’ch teulu ac ymunwch â ni am noson wych arall yn 1891, Y Rhyl.”
 
Manylion y Digwyddiad

SC2 Y Rhyl yn cadw ei Wobr Aur am Ragoriaeth gan Croeso Cymru

Mae SC2, atyniad twristiaeth enwog HSDd, wedi llwyddo i gadw ei Wobr Aur anrhydeddus gan Croeso Cymru, yn gydnabyddiaeth am ei safonau uchel fel Atyniad Ymwelwyr â Sicrwydd Ansawdd.

Wedi’i leoli ar bromenâd y Rhyl, mae SC2 yn denu dros 10,000 o ymwelwyr yr wythnos i’r Rhyl yn ystod yr haf, ac mae’n un o brif atyniadau twristiaeth gogledd Cymru.

Yn dilyn Asesiad o Atyniadau Ymwelwyr trylwyr gan Croeso Cymru, dyfernir y Wobr Aur i atyniadau sydd yn cyflawni rhagoriaeth am eu cyfleusterau a gwasanaethau i gwsmeriaid. Mae’r asesiad manwl yn edrych ar daith y cwsmer o’ch dechrau i’r diwedd, ac yn yr adroddiad, fe nodir fod yna nodweddion ardderchog i ymwelwyr o bob oed, ac fe ganmolir SC2 am ei daclusrwydd perffaith a lefelau uchel o lendid.  

Mae yna rywbeth i’r teulu cyfan yn SC2, gyda pharc dŵr a reidiau cafn syfrdanol, Pad Sblasio yn yr awyr agored ar gyfer diwrnodau cynnes yr haf, Ninja Tag, cwrs rhwystrau aml lefel cyffrous a Chwarae Antur, ardal chwarae â thema dinosoriaid i ymwelwyr iau.  Mae Bwyty’r Goedwig Law a’r Teras awyr agored yn llefydd perffaith i’r teulu gael rhywbeth i fwyta ar ôl eu hanturiaethau.

Meddai Chelsea Bond, tîm Sicrhau Safon Croeso Cymru:  “Llongyfarchiadau ar gyflawni Safon Atyniad â Sicrwydd a’r Wobr Aur unwaith eto eleni”.

Meddai Jamie Groves, Rheolwr Gyfarwyddwr HSDd, “Mae’r wobr yma’n cydnabod y cynnig gwych yr ydym yn ei ddarparu yn SC2. Mae ein tîm yn gweithio’n arbennig o galed ac yn ymfalchïo yn y ffaith fod cwsmeriaid yn derbyn y profiadau gorau posibl pan maen nhw’n ymweld â ni. Mae’r asesiad gan Croeso Cymru yn cael ei gynnal ar ffurf ymwelydd cudd, felly mae hi’n amhosibl i ni flaen gynllunio. Rydym yn falch ein bod wedi cael marciau llawn mewn sawl rhan o’r asesiad ac yn dilyn y wobr, rydym yn hyderus ein bod yn darparu gwasanaeth o safon euraidd i’n cwsmeriaid o ddydd i ddydd. Mae’n anrhydedd ein bod wedi llwyddo i gadw’r wobr unwaith eto, ac rydym yn edrych ymlaen at greu hyd yn oed mwy o atgofion gwych dros yr haf i’n hymwelwyr.”

DLL i gynnal Diwrnod Agored Ffitrwydd Cymunedol AM DDIM yng Nghlwb Nova, Prestatyn

Mae DLL yn cynnal Diwrnod Agored Ffitrwydd Cymunedol am ddim, ddydd Sul 13 Medi, 12pm-4pm, i ddangos y profiadau ffitrwydd gorau yng Nghlwb Nova Prestatyn.
Gyda champfa newydd gael ei hailwampio, amrywiaeth eang o ddosbarthiadau ymarfer corff i grwpiau, a gwersi nofio, mae yna weithgareddau i’r teulu cyfan yn y Diwrnod Agored Ffitrwydd. 
 
Yn dilyn llwyddiant Diwrnod Agored Cymunedol y llynedd yng Nghlwb y Rhyl, fe fydd y digwyddiad, a gynhelir rhwng 12pm a 4pm yn cynnwys gweithgareddau am ddim, ynghyd â gostyngiadau arbennig ar gyfer sesiynau Chwarae Antur, a chynigion i unrhyw un sy’n dymuno cychwyn eu siwrnai ffitrwydd gyda DLL. 
 
Fe fydd prif hyfforddwr Technogym, Kara Frost yn dychwelyd ar ôl galw mawr i gyflwyno clinigau dosbarth meistr Technogym, yn cynnwys clinig i ferched yn unig, ynghyd ag adloniant i’r teulu a DJ.  Fe fydd bwyty Cwt y Traeth a Chaffi Chwarae poblogaidd y Nova ar agor, a bydd gostyngiadau arbennig ar gael ar brydau a byrbrydau.
Meddai Jamie Groves, Rheolwr Gyfarwyddwr DLL, “Rydym ni wir yn edrych ymlaen at ddangos y gorau sydd gan y Nova i’w gynnig i bawb yn ein Diwrnod Agored Ffitrwydd Cymunedol.  Rydym ni’n falch iawn o’n hatyniad enwog, sydd â phopeth y mae’r gymuned ei angen ar gyfer ffitrwydd a chwarae ynghyd â’r bwytai gorau dan do ac yn yr awyr agored. Gyda gweithgareddau i bob oedran ac arweiniad gan arbenigwyr ar gael drwy gydol y dydd, fe fydd y Diwrnod Agored Ffitrwydd yn cynnig rhywbeth i bawb. Mae ein hymrwymiad i fuddsoddi yn ein cyfleusterau yn golygu bod y Nova yn enghraifft berffaith o safon a gwerth eithriadol y gall aelodau DLL ei fwynhau.  Mae’r tîm cyfan yng Nghlwb Nova yn edrych ymlaen at ddangos i bawb yr hyn sydd gan DLL i’w gynnig i’r gymuned, felly dewch draw i ymuno â ni am yr hyn sydd yn sicr o fod yn ddiwrnod o ffitrwydd a hwyl!”
Gall rhai nad ydynt yn aelodau archebu o ddydd Sul 30 Awst trwy gysylltu â’r safle ar 01824 774872. Gall aelodau archebu o ddydd Sul 6 Medi ar Ap DLL.

DLL yn cefnogi RNLI gyda digwyddiad BeachROX hynod lwyddiannus, cyntaf erioed

Cynhaliwyd digwyddiad BeachROX cyntaf erioed yr RNLI, a gefnogwyd gan DLL, y penwythnos diwethaf ar Arena Digwyddiadau’r Rhyl a thraeth y Rhyl, i ddathlu 25 mlynedd ers achubwyr bywyd yr RNLI.
 
Cynhaliwyd y digwyddiad cymunedol llwyddiannus, a oedd yn un o raglen ehangach o weithgareddau i ddathlu 25 mlynedd ers sefydlu Achubwyr Bywyd yr RNLI yn 2026, yng Ngorsaf Bad Achub y Rhyl rhwng 4pm a 9pm, ddydd Sadwrn 15 Awst yn y Rhyl, a bu nifer wych o bobl yno yn cymryd rhan. 
 
Mae BeachROX yn her ar y traeth sydd wedi’i ysbrydoli gan Hyrox, ac mae’n cyfuno dygnwch, ffitrwydd gweithredol ac elfennau bad achub ac achub bywyd yr RNLI gyda dros 80 o gyfranogwyr yn cymryd rhan.
 
Cafodd cryfder, stamina a phenderfyniad y cyfranogwyr eu profi, ac fe aethant ati’n frwdfrydig p’un a ddaethant draw i gael hwyl gyda’u ffrindiau, neu am eu bod eisiau her ffitrwydd gwirioneddol.  
 
Er mwyn helpu i gefnogi’r digwyddiad gwych yma, darparodd HSDd amrywiaeth o’i offer ffitrwydd gorau, ac fe  ymunodd un o hyfforddwyr ysbrydoledig HSDd â’r RNLI ar y diwrnod. Derbyniodd pob cyfranogwr a gwblhaodd y digwyddiad daleb ar gyfer bwyty blaenllaw DLL, 1891.
 
Dywedodd Lucy Tilston, Goruchwylydd Arweiniol Achubwyr Bywyd “Dydd Sadwrn cynhaliom ein digwyddiad BeachROX cyntaf un yng Ngorsaf Bad Achub y Rhyl, gyda mwy na 85 o gyfranogwyr yn cymryd y cwrs heriol o 8 x 1km o rediadau, pob un wedi’i gyfuno ag ymarfer ymarferol wedi’i ysbrydoli gan weithgareddau achub bywyd allweddol. Roeddem wrth ein bodd i gael cwmni dylanwadwyr Jamie Ayshford ac Alexandra Huffen, a gefnogodd a gymerodd ran yn y digwyddiad. Roedd y diwrnod yn llwyddiant ysgubol, ac ni allem fod wedi’i wneud heb gefnogaeth anhygoel ein gwirfoddolwyr RNLI a’r cymorth gwych gan DLL, a weithiodd ochr yn ochr â ni drwy gydol y digwyddiad. Rydym eisoes wedi cael llawer o bobl yn gofyn pryd fydd yr un nesaf, felly cadwch lygad ar ein gwefan Instagram: rnli_lifeguards_northwales am ddiweddariadau yn y dyfodol!”
 
Dywedodd Jamie Groves, Rheolwr Gyfarwyddwr DLL “Ers cyflwyno Achubwyr Bywyd cyntaf yr RNLI 25 mlynedd yn ôl, mae eu timau wedi achub mwy na 2,000 o fywydau ar draws y DU. Gan fod ein harfordir hardd yn rhan mor annatod o’n bywydau yma yn Sir Ddinbych, rydym i gyd yn ddiolchgar am y mae gwaith mae RNLI yn ei wneud yn ddyddiol.  Gan fod ffitrwydd yn rhywbeth rydym ni’n angerddol yn ei gylch yn HSDd, roeddem wrth ein boddau yn cefnogi’r digwyddiad gwerth chweil yma ac rydym yn falch fod pawb wedi cael prynhawn gwych, boed nhw’n cymryd rhan neu’n cefnogi ffrindiau neu deulu. Mae’r RNLI yn gwneud cyfraniad enfawr i gymuned y Rhyl ac rydym ni’n falch ein bod wedi cefnogi’r prynhawn yma i’w gofio!” 
 
Am y 25 mlynedd diwethaf, mae Achubwyr Bywyd yr RNLI wedi bod yn helpu i gadw ein harfordiroedd yn fwy diogel. Fel rhan o ddathliadau 25 mlwyddiant Achubwyr Bywyd yr RNLI, mae’r RNLI yn gobeithio codi cymaint o roddion â phosib i gefnogi eu gwaith achub bywyd a’u helpu i barhau i achub bywydau am flynyddoedd lawer i ddod.
 
Os hoffech gefnogi RNLI gallwch gyfrannu yma:  Celebrating Lifeguards 25th – Wirral & Denbighshire Lifeguards – JustGiving

Prosiect celfyddydau cymunedol arloesol yn darparu manteision cymdeithasol ac economaidd sylweddol ar draws Conwy a Sir Ddinbych

Mae rhaglen gelfyddydau ac iechyd arloesol a gyflwynir ar y cyd trwy bartneriaeth rhwng Hamdden Sir Ddinbych Cyf (DLL), Cyngor Bwrdeistref Sirol Conwy a Bwrdd Iechyd Prifysgol Betsi Cadwaladr (BIPBC) wedi dangos manteision sylweddol ar gyfer lles meddwl wrth gynhyrchu enillion cymdeithasol trawiadol ar fuddsoddiad.
Rhedodd ‘Ymbarél yn Erbyn y Glaw’, a ariannwyd gan Elusennau’r GIG Gyda’i Gilydd, rhwng Mai 2025 a Mawrth 2026 ar draws Conwy a Sir Ddinbych. Daeth y prosiect 10 mis â 161 o gyfranogwyr ynghyd a oedd yn profi heriau iechyd meddwl, a gymerodd ran mewn amrywiaeth o weithgareddau creadigol gan gynnwys celfyddydau gweledol, cerddoriaeth, dawns a chanu. Yn ogystal, cymerodd staff o’r sefydliadau partner, ochr yn ochr ag artistiaid llawrydd, ran mewn sesiynau lles a hyfforddiant arbenigol yn canolbwyntio ar greadigrwydd ac iechyd meddwl.
Dangosodd canfyddiadau’r gwerthusiad annibynnol o’r Enillion Cymdeithasol ar Fuddsoddiad fod y prosiect wedi cynhyrchu £5.66 o werth cymdeithasol am bob £1 a fuddsoddwyd, gan amlygu effaith gadarnhaol dulliau seiliedig ar y celfyddydau ar gyfer lles ac atal.
Dywedodd Jamie Groves, Rheolwr Gyfarwyddwr DLL, “Wrth i’r galw am gymorth iechyd meddwl hygyrch barhau i dyfu, mae prosiectau fel ‘Ymbarél yn Erbyn y Glaw’ yn darparu enghraifft gymhellol o sut y gall y celfyddydau nid yn unig gyfrannu at gymunedau iachach, ond hefyd ddarparu manteision cymdeithasol ac economaidd sylweddol i wasanaethau cyhoeddus, partneriaid a’r cyhoedd ehangach. Mae DLL yn falch o fod wedi bod yn rhan o brosiect mor llwyddiannus, a ddangosodd yn glir yr effaith drawsnewidiol y gall ymgysylltu creadigol ei chael ar unigolion a chymunedau.”
Dywedodd y Cynghorydd Dilwyn Roberts, Aelod Cabinet Conwy dros Ddiwylliant, Hamdden a Gwasanaethau Llywodraethu, “Mae’r fenter hon wedi bod yn enghraifft ardderchog o weithio mewn partneriaeth. Rwy’n falch iawn bod y prosiect wedi cyrraedd cymunedau ar draws y ddwy sir, gan gynnwys ardaloedd gwledig fel Betws y Coed. Mae’n dangos sut y gall gweithgareddau lles sy’n seiliedig ar y celfyddydau, a ddarperir yn lleol, gefnogi atal ac ymyrraeth gynnar mewn iechyd meddwl – gan leihau’r pwysau ar ein gwasanaethau statudol ac yn bwysig helpu pobl i ailgysylltu â’u cymunedau trwy greadigrwydd.”
Dangosodd canfyddiadau’r gwerthusiad ystod o ganlyniadau cadarnhaol, dywedodd un cyfranogwr: “Mae wedi bod yn rhywbeth da i edrych ymlaen ato mewn cyfnod anodd iawn yn fy mywyd. Rwyf wedi mwynhau’r cysylltiad â natur ac effaith dawelu’r gweithgareddau. Rwy’n gobeithio’n fawr y bydd digwyddiadau eraill fel hyn y gallaf fynychu.”
Nododd 83% o’r cyfranogwyr eu bod yn teimlo’n llai unig ac ynysig, profodd 79% well hunan-barch a dysgodd 76% ffyrdd newydd o reoli eu hiechyd meddwl. Mae’r canfyddiadau hyn yn ychwanegu at gorff cynyddol o dystiolaeth sy’n dangos y gall ymyriadau sy’n seiliedig ar y celfyddydau wneud gwahaniaeth gwirioneddol i fywydau pobl a bod ganddynt y potensial i leihau pwysau ar wasanaethau iechyd a chymdeithasol.

Cyhoeddi cast llawn pantomeim ysblennydd Aladdin Theatr Pafiliwn y Rhyl y Nadolig hwn

Gellid teimlo hud y Nadolig yn bendant yn Theatr Pafiliwn y Rhyl yr wythnos hon, wrth i gast serennog pantomeim eleni, Aladdin, gael ei gyhoeddi.
 
Mae’r cynhyrchiad, sy’n dod i’r Rhyl gan yr arobryn Anton Benson Productions, yn cynnwys rhestr drawiadol o ffefrynnau teledu, cerddoriaeth, comedi a phantomeim.
Bydd panelwr Loose Women a chantores Eternal, Kelle Bryan, ffefryn Coronation Street Peter Ash, enillwyr Britain’s Got Talent Ashleigh a Tapas, seren Casualty Amanda Henderson, Dan Whitley, Alex Aram ac Indiya Payne i gyd yn ymuno â’r cast ar gyfer antur hudolus eleni ym Mhafiliwn y Rhyl o’r 5ed – 31ain Rhagfyr 2026.
 
Rhoddodd cyfarfod cyntaf y cast yr wythnos hon gipolwg ar yr adloniant a’r cyffro y gall cynulleidfaoedd ei ddisgwyl pan fu’r llen yn codi ym mis Rhagfyr, gyda’r tîm bellach yn edrych ymlaen at ymgartrefu yn Theatr Pafiliwn y Rhyl y Nadolig hwn.
 
Dywedodd Jamie Groves, Rheolwr Gyfarwyddwr DLL: “Rydym wrth ein bodd yn croesawu cast mor wych i Theatr Pafiliwn y Rhyl. Maen nhw’n dod â chymysgedd anhygoel o dalent, profiad, personoliaeth ac, yn bwysicaf oll, y gallu i greu’r math o hud Nadoligaidd y mae cynulleidfaoedd yn ei gofio ers blynyddoedd. Rydym yn edrych ymlaen yn fawr at eu croesawu’n ôl i’r Rhyl adeg y Nadolig a gwneud Pafiliwn y Rhyl yn gartref iddyn nhw ar gyfer tymor yr ŵyl. Mae pantomeim yn rhan mor bwysig o’r Nadolig i deuluoedd ledled Gogledd Cymru, ac allwn ni ddim aros i weld y theatr yn llawn teuluoedd, chwerthin, cerddoriaeth a digon o ddireidi Nadoligaidd drwy gydol mis Rhagfyr.”
 
Dywedodd Anton Benson o Anton Benson Productions: “Rydym wrth ein bodd yn dod ag Aladdin yn ôl i Theatr Pafiliwn y Rhyl y Nadolig hwn ac yn gweithio gyda DLL unwaith eto. Roedd cael y cast llawn at ei gilydd am y tro cyntaf yr wythnos diwethaf yn foment gyffrous iawn ac roeddech chi’n gallu teimlo’r egni a’r cyfeillgarwch ymysg pawb yn syth bin. Rydym wedi dod â grŵp anhygoel o berfformwyr ynghyd a fydd yn gwneud hwn yn Nadolig arbennig iawn i gynulleidfaoedd yn y Rhyl ac ar draws Gogledd Cymru. Rydym yn edrych ymlaen at symud i’r Pafiliwn a’i wneud yn gartref i ni ar gyfer mis Rhagfyr. Gyda llawer o chwerthin, cerddoriaeth, cynhyrchiad ysblennydd gan gynnwys carped hedfan syfrdanol a digon o gyfranogiad gan y gynulleidfa, bydd Aladdin yn wledd Nadolig hudolus i’r teulu cyfan.”
 
Ychwanegodd Kelle Bryan: “Rwy’n gyffrous iawn i fod yn perfformio yn y Rhyl hardd y Nadolig hwn ac yn dod â rhywfaint o ysbryd Nadoligaidd i bawb dros dymor y Nadolig. Mwynhau!”
 
Gall cynulleidfaoedd ddisgwyl holl gynhwysion pantomeim Nadoligaidd traddodiadol, ynghyd â’r ychwanegiadau arbennig y mae cynulleidfaoedd Pafiliwn y Rhyl wedi dod i’w disgwyl, gan gynnwys gwisgoedd disglair, comedi ddoniol, effeithiau arbennig ysblennydd, cerddoriaeth, hud a digon o gyfranogiad gan y gynulleidfa.

DLL yn dod â haf o nosweithiau DJ i 1891 Y Rhyl

Ni fydd y curiad yn stopio ar Deras 1891 yr haf hwn, wrth i DLL lansio mis cyfan o nosweithiau DJ gwych, i gyd yn hollol RHAD AC AM DDIM.

Dewch i ddawnsio i’r trac sain orau, wrth i DJ preswyl 1891 gymysgu’r holl ganeuon poblogaidd, ffefrynnau clasurol ac anthemau llawr dawns. O 4pm tan 9pm, ar ddydd Sadwrn 8fed Awst, dydd Gwener 14eg Awst, dydd Gwener 28ain Awst a dydd Sadwrn 29ain Awst.

Gyda awyrgylch trydanol ac awyrgylch hafaidd, mae nosweithiau DJ byw DLL wedi’u cynllunio i ddod â’r teimlad hwnnw o hwyl haf i chi! P’un a ydych chi’n dod draw am y dawnsio, y caneuon neu chwilio am noson wych o adloniant gwych heb unrhyw gost, fe gewch chi’r croeso gorau yn 1891!

I gadw eich lefelau egni yn uchel, beth am edrych ar fwydlen flasus y Teras neu fwynhau cynigion bwyd gwych 1891 – pitsa wedi’i bobi ar garreg gyda photel o prosecco neu jwg 4 peint am ddim ond £25*! Neu ymlaciwch a mwynhewch y machlud haul gyda 2 goctel o’n dewislen Spritz Hafaidd am ddim ond £14*!

Dywedodd Jamie Groves, Rheolwr Gyfarwyddwr DLL “Gyda golygfeydd godidog, bwyd gwych a cherddoriaeth wych, bydd DLL yn dathlu’r gwyliau haf ar Deras  1891! Rydym wrth ein bodd yn gweld pobl lleol ac ymwelwyr yn mwynhau’r nosweithiau gorau gyda ni, ac rydym am i bawb ddod draw, ymuno â ni ar y llawr dawnsio a mwynhau’r awyrgylch trydanol na all ond 1891 ei ddarparu. Rydym wrth ein bodd yn dod â’r digwyddiadau haf hyn i chi am ddim, felly gwisgwch eich esgidiau dawnsio a byddwn yn eich gweld chi yn 1891!”

Mae mynediad am ddim ac nid oes angen archebu. *Am delerau ac amodau’r cynnig gweler gwefan DLL

Hamdden Sir Ddinbych yn cefnogi dros 130 o ddigwyddiadau hwyliog am ddim ar hyd a lled Sir Ddinbych dros yr haf

Mae Hamdden Sir Ddinbych a’i bartneriaid yn dod â dros 130 o ddigwyddiadau lles am ddim i Sir Ddinbych ar gyfer plant a phobl ifanc dros yr haf. 

Bydd y sesiynau am ddim yn cynnwys gweithgareddau ar y traeth, pêl-droed merched, sesiynau chwarae, digwyddiadau ieuenctid a diwrnodau o hwyl i’r teulu, ac maen nhw wedi’u creu i gynnig rhaglen o ddigwyddiadau am ddim i deuluoedd mewn amgylchedd hwyliog, diogel a chroesawgar. Gan gydweithio â nifer o sefydliadau partner, bydd tîm Chwaraeon Cymunedol Hamdden Sir Ddinbych yn cefnogi’r sesiynau hwyliog hyn mewn cymunedau ar hyd a lled y sir. 

Bydd digwyddiadau’r gogledd yn cynnwys diwrnodau ar y traeth, sesiynau chwarae, sesiynau pêl-droed merched a llawer mwy, ac ymhellach i’r de, bydd y sesiynau’n cynnwys pêl-droed mynediad agored, diwrnodau o hwyl i’r teulu a Diwrnodau Chwarae Cenedlaethol.  Gyda chyllid o Gronfa Gymunedol Comisiynydd yr Heddlu a Throsedd, ac mewn cydweithrediad â Gwasanaethau Ieuenctid CSDd, bydd digwyddiadau ‘Miri Mawr yr Haf’ i bobl ifanc dros 11 oed hefyd yn cael eu cynnal mewn nifer o gymunedau.

Meddai Jamie Groves, Rheolwr Gyfarwyddwr Hamdden Sir Ddinbych Cyf: “Gyda chwe wythnos o wyliau’r haf o’n blaenau, mae pawb yn gwybod y gall diddanu plant a phobl ifanc fod yn waith drud braidd.  Mae Tîm Chwaraeon Cymunedol Hamdden Sir Ddinbych wedi bod yn gweithio gyda nifer o sefydliadau partner i lunio rhaglen wych o weithgareddau lles mewn cymunedau ar hyd a lled Sir Ddinbych, a’r rheiny i gyd YN RHAD AC AM DDIM.  Mae yna ddigon o ddewis ar gael, gyda rhywbeth i ddiddanu pawb ac i gadw hyd yn oed y plantos mwyaf egnïol yn brysur! Felly p’un a ydych chi yn Llangollen neu ym Mhrestatyn, cofiwch ddod draw i gymryd rhan mewn cymaint o’r digwyddiadau ag y gallwch chi!”

Mae’r manylion llawn i’w gweld ar ein sianeli ar y cyfryngau cymdeithasol, ac i gael gwybodaeth ewch draw i’n gwefan https://denbighshireleisure.co.uk/ac-2026/

Assist Fit yng Nghlwb Rhyl wedi newid bywydau medd aelodau

Mae aelodau yng Nghlwb Rhyl sy’n defnyddio ystafell Assist Fit modern Hamdden Sir Ddinbych wedi dweud ei fod wedi newid bywydau a bod yna ymdeimlad o gymuned yno.
 
Mae Dilys Bagnall, 87, o’r Rhyl, wedi bod yn defnyddio Assist Fit ers iddo agor flwyddyn yn ôl ac mae hi’n creu bod defnyddio’r stiwdio yn aml wedi bod o fudd iddi hi yn feddyliol ac yn gorfforol, a phobl eraill mae hi’n ymarfer corff gyda nhw’n rheolaidd.
 
Mae Assist Fit, sydd wedi’i leoli yng Nghlwb Rhyl poblogaidd Hamdden Sir Ddinbych, wedi’i ddylunio i fod yn ddatrysiad perffaith i’r rheini sy’n byw gyda chyflyrau hirdymor a’r rhai sy’n teimlo nad ydynt yn barod ar gyfer amgylchedd campfa arferol.  Mae technoleg ymarfer corff gyda chymorth pŵer yn ddiogel i bob gallu, gan nad yw defnyddwyr yn gorfod darparu’r pŵer symudol i oresgyn llesgedd.
Gall defnyddio Assist Fit helpu i fagu hyder a helpu aelodau o bosibl i symud ymlaen i weithgareddau pellach yn y dyfodol.   I’r aelodau sy’n chwilio am ymarferion effaith isel i’r corff cyfan, mae Assist Fit yn rhoi help llaw perffaith iddynt gael eu cryfder yn ôl.
 
Meddai Dilys: “Dwi wedi gweld sut mae wedi bod o fudd yn gorfforol ac yn feddyliol i bobl eraill sydd yn dod yma.  Mae werth ei wneud ac mae ar gael i unrhyw un! Dwi’n teimlo fel ei fod yn rhoi diwedd ar unigrwydd ac mae yna ymdeimlad cymunedol o fod yn sesiynau Assist Fit. Mae tîm Hamdden Sir Ddinbych sydd ar y safle yn hyfryd ac yn groesawgar iawn.  Mae’n sicr wedi fy helpu i yn gorfforol, fe ges i glun newydd 18 mlynedd yn ôl a ‘dwi wedi cael dwy ben-glin newydd, ynghyd â phinnau a phlatiau yn fy nhraed, ac mae hyn yn sicr yn helpu.  Mae wedi newid fy mywyd a dwi wedi cyfarfod pobl hyfryd”.
Yn ei flwyddyn gyntaf, mae Assist Fit wedi bod yn boblogaidd iawn yn y gymuned leol, gan ddarparu nid yn unig buddion iechyd, ond cyfle i gymdeithasu gydag aelodau eraill.   Dros y deuddeg mis cychwynnol, mae’r adborth gan ddefnyddwyr wedi bod yn eithriadol, ac mae nifer yn ymweld yn rheolaidd ac yn meddwl bod y gampfa’n lle cyfforddus a hygyrch, gan alluogi iddynt ymgysylltu mewn ymarfer rheolaidd a chreu newidiadau cadarnhaol yn eu hymddygiad.  
Meddai Jamie Groves, Rheolwr Gyfarwyddwr Hamdden Sir Ddinbych:  “Mae’n wych clywed sut mae aelodau’n elwa o Assist Fit. Mae Assist Fit yn ymwneud â chefnogaeth, cymuned a lles ac mae’n glod i’r tîm yng Nghlwb Rhyl am eu gwasanaeth gwych i gwsmeriaid.  Mae Hamdden Sir Ddinbych wedi bod yn ymroddedig i gyflwyno cynigion hamdden i’w aelodau gyda’r nod o wella ffitrwydd, iechyd a lles meddyliol yn ein cymunedau.   Mae Assist Fit wedi’i ddylunio i ganolbwyntio ar gwsmeriaid gydag anghenion ffitrwydd penodol, ac i bobl nad ydi amgylchedd ein campfa yn addas, ac rydym yn falch iawn o glywed am fanteision Assist Fit ymysg ein haelodau.   Mae’r gymuned wych sydd wedi cael ei ffurfio o fewn amgylchedd Assist Fit yn newyddion mwy cadarnhaol.
 
Mae manylion llawn yr aelodaeth newydd ar gael ar wefan Hamdden Sir Ddinbych.   Mae sesiynau blasu am ddim ar gael i unrhyw un sydd awydd rhoi cynnig ar Assist Fit. I archebu, cysylltwch â Chlwb Rhyl drwy ffonio 01824 774871.
Llywio o amgylch y safle
Gyrfaoedd gyda Hamdden Sir Ddinbych

Cliciwch isod i weld pa swyddi gwag sydd gennym ar y funud

Rhagor o wybodaeth

Gadewch i ni gymdeithasu
Hawlfraint Denbighshire Leisure Ltd 2020. Cedwir Pob Hawl. Safle gan TA6