Mae HSDd (Hamdden Sir Ddinbych Cyf) yn hyrwyddo Wythnos Ymwybyddiaeth Iechyd Meddwl trwy bartneriaeth barhaus rhwng eu Tîm Celfyddydau Cymunedol a Chwmni Buddiannau Cymunedol Carter’s. 

Cynhelir Wythnos Ymwybyddiaeth Iechyd Meddwl rhwng 11 Mai a 17 Mai ac mae’n canolbwyntio ar bwysigrwydd iechyd meddwl a helpu’r rhai sydd angen cymorth.

Fel Cwmni Buddiannau Cymunedol, mae Carter’s, sydd wedi’i leoli yn Rhuthun, yn gweithredu gyda phwrpas cymdeithasol yn ganolog i bopeth, gan ailfuddsoddi ei ymdrechion ac adnoddau i gefnogi pobl leol i gyflawni buddion go iawn tra’n parhau i ganolbwyntio ar effaith cymdeithasol yn hytrach nag elw.   Dros y misoedd diwethaf mae Tîm Celfyddydau Cymunedol HSDd wedi bod yn cydweithio gyda Carter’s i ddarparu ymyraethau creadigol i leihau arwahanrwydd ac unigrwydd tra’n hyrwyddo lles ar hyd a lled Sir Ddinbych.

Gyda’i gilydd mae HSDd a Carter’s wedi bod yn darparu gweithdai creadigol gyda chefnogaeth Creative Well BIPBC wedi’i ariannu gan NHS Charities Together. Grŵp atgyfeirio yn unig yw ‘More Than A Cuppa’, ac mae ar agor i oedolion sy’n gleifion gyda Gwasanaethau Iechyd Meddwl Gofal Eilaidd.

Mae Cwmni Buddiannau Cymunedol Carter’s yn darparu amgylchedd diogel, cynhwysol lle gall unigolion gysylltu, meithrin perthnasoedd a datblygu ymdeimlad o berthyn.  Trwy ei weithgareddau a chefnogaeth, nod y sefydliad yw gwella lles meddyliol a chreu cyfleoedd ar gyfer ymgysylltiad cymdeithasol ystyrlon—yn enwedig ar gyfer y rhai allai fod yn teimlo’n unig neu’n ddigyswllt.

Meddai Holly Williams, Cwnselydd Therapiwtig gyda Carter’s  “Trwy feithrin mannau cynhwysol ac annog cyfranogiad cymunedol, mae Cwmni Buddiannau Cymunedol Carter’s yn helpu i greu rhwydweithiau lleol cryfach sydd yn fwy gwydn a chynnig cefnogaeth hollbwysig i unigolion sydd ei angen fwyaf.”  Meddai un cyfranogwr, “Doeddwn i ddim yn gadael y tŷ o’r blaen. Roedd ymuno â grŵp cymdeithasol yn rhywbeth mawr i mi ei wneud ac mae hi wedi cymryd peth amser i mi hyd yn oed fynd mewn i’r adeilad – ond mi alla’ i wneud hynny rŵan. Mae’r grŵp yma’n rhoi strwythur i fy wythnos, dwi’n gwybod fy mod i’n mynd i Carter’s ar ddyddiau Gwener.”

Meddai Jamie Groves, Rheolwr Gyfarwyddwr HSDd “Mae codi ymwybyddiaeth am iechyd meddwl a lles, ynghyd â helpu’r rhai sydd angen cymorth yn rhywbeth mae ein Tîm Celfyddydau Cymunedol yn rhagori arno.   Trwy dynnu sylw at ein partneriaeth gyda Carter’s a chefnogi Wythnos Ymwybyddiaeth Iechyd Meddwl, rydym ni’n cymryd camau cadarnhaol tuag at gael gwell dealltwriaeth o sut y gall pobl gael mynediad at y cymorth sydd ei angen arnynt.”

Ar hyn o bryd, mae’r artist proffesiynol Jude Wood yn cyflwyno gweithdai yn Rhuthun gyda Carter’s gyda chefnogaeth gan Gyngor Celfyddydau Cymru.  Mae Sesiynau Lles Creadigol i Ferched yn cynnal sgyrsiau agored am bynciau sydd o bwys i ferched, yn cynnwys perimenopôs a menopôs, perthnasoedd, hunaniaeth a newidiadau bywyd, pryder a niwroamrywiaeth.